Муркаш округӗнче Китай ҫыннисем ҫухалса кайнӑ. Вӗсене инспекторсем пулӑшнӑ.
Вӗсем навигаторпа усӑ курса фурӑпа пынӑ, анчах вӑл ҫул ҫинчен аташтарса янӑ. Ҫапла Китай ҫыннисем Нискасси тата Елших ялӗсем патнелле кӗрсе кайнӑ та вӗтӗ чул сарнӑ ҫул ҫинче кӗрсе ларнӑ.
Китай ҫыннисене пулӑшма Патшалӑх автоинспекцийӗн ӗҫченӗсем Алексей Филимонов тата Константин Кульков пулӑшма кайнӑ. Вӗсем онлайн-куҫаруҫӑпа усӑ курса вӗсене пулӑшнӑ. Китай ҫыннисем малалла кайнӑ.
Муркаш округӗнчи Ҫатракасси ялӗнче пурӑнакан 39 ҫулти арҫынна тытса чарнӑ, ун тӗлӗшпе пуҫиле ӗҫ пуҫарнӑ.
Вӑл кӳршине вӗлернӗ тесе шутлаҫҫӗ. Следстви версийӗ тӑрӑх, пуш уйӑхӗн 31-мӗшӗнче ҫак арҫын ӳсӗр пулнӑ, кӳршипе вӑрҫӑнса кайнӑ. Хайхискер ӑна кӗлеткин тӗрлӗ пайӗнчен пуртӑпа ҫапнӑ. Лешӗ йывӑр сурансене пула ҫавӑнтах вилнӗ.
Арҫынна тӳрех тытса чарнӑ. Халӗ тӗрлӗ экспертиза тӑваҫҫӗ, кӳнтеленсенчен ыйтса пӗлеҫҫӗ.
Муркаш тӑрӑхӗнче пурӑнакан Макаровсем патшалӑх укҫипе усӑ курса усламҫӑсем пулса тӑнӑ.
Ҫемье район центрӗнче, Муркашра пурӑнать. Социаллӑ контракт алӑ пусса патшалӑхран укҫа илме май пуррине илтсен арӑмӗпе упӑшки ку майпа усӑ курса юлас тенӗ. Халӗ Иван машинӑсем юсать, арӑмӗ Амиля ача-пӑча таварӗ сутакан лавкка уҫнӑ.
Республикӑн влаҫ органӗсен официаллӑ порталӗ халӑх тетелӗнчи хӑйӗн пабликӗнче хыпарланӑ тӑрӑх, Иван уҫнӑ автосервис халӑхра та ырӑ ят ҫӗнсе илме ӗлкӗрнӗ. Ӑна ҫынсем шанаҫҫӗ, машинӑна тӗплӗ юсать тесе ырлаҫҫӗ. Вӑр-вар та чӗрӗ арҫын коллектива професси енчен аталанма пулӑшать, кулленхи ӗҫре ҫӗнӗлле тимлеме тӑрӑшнӑ май хальхи вӑхӑтри технологисене пурнӑҫа кӗртсе пырать, вӗсемпе усӑ курать.
«Муниципалитет хыснине те йӗркелет, укҫа-тенкӗпе пӗлсе усӑ курма та вӗрентет», — ҫакӑн пек ырласа ҫырнӑ республикӑн влаҫ органӗсен официаллӑ порталӗн халӑх тетелӗнчи пабликӗнче. Кунта сӑмах Рената Ананьева пирки пырать.
Рената Ананьева Муркаш тӑрӑхӗн администрацийӗнче пуҫлӑхӑн ҫумӗ пулса тӑрӑшать. Профессири вӑрӑм кун-ҫулне вӑл совхозри тӗп бухгалтертан пуҫланӑ. Халӗ 35 ҫул ӗнтӗ Рената Иосифовна — финанс енӗпе пысӑк специалист.
Вӑл ертсе пыракан ушкӑн «Лучшее муниципальное образование России» (чӑв. Раҫҫейри чи лайӑх муниципалитет пӗрлешӗвӗ) конкурсра темиҫе хутчен те ҫӗнтернӗ.
Рената Иосифовна нумаях пулмасть «Чӑваш Республикин тава тивӗҫлӗ экономисчӗ» хисеплӗ ята тивӗҫнӗ.
Ака уйӑхӗн 10-мӗшӗнче Муркаш тӑрӑхӗнчи Калайкасси шкулӗнче «Чӑваш ачи чӑвашах» 10-мӗш фестиваль иртӗ.
Чӑваш Республикин Вӗрену институчӗн ӗҫченӗ Анна Егорова пӗлтернӗ тӑрӑх, фестивале тӑватӑ енпе хутшӑнма май килӗ: «Вӗрентетпӗр чӑвашла» (чӑваш чӗлхи предметне вӗрентмен учительсем хутшӑнса чӑвашла уроксем кӑтартса парӗҫ); «Савӑнатӑп эп чӑваш пулнишӗн» (кӗҫӗн классенче вӗренекен ачасем чӑваш халӑхӗн пӗр-пӗр йӑлине кӑтартса парӗҫ); «Сар каччӑпа сарӑ хӗр» (7-9 классенче вӗренекен ачасем чӑваш халӑх историне, культурине, чӗлхине, йӑли-йӗркине пӗлнине ӑс-тӑн вӑййинче кӑтартӗҫ); «Тӑвалла пулсан та малалла» (чӑвашлӑх туйӑмне аталантаракан проекта вӗренӳ организацийӗн директорӗ (заведующийӗ) е унӑн ҫумӗ хӳтӗлӗ).
Муркаш округӗнчи Ятман ялӗнче пурӑнакан Родионовсем пӗрлешнӗренпе 60 ҫул ҫитнине паллӑ тунӑ. Вӗсем пӗр-пӗрне ачаранпах паллаҫҫӗ, мӗншӗн тесен пӗр шкулта вӗреннӗ. Ун чухне, коридорта пӗр-пӗринпе ҫапӑнса иртсе кайнӑ чухне, ҫулсем иртсен ҫемье чӑмӑртасси пирки шухӑшламан та вӗсем.
Феликс Михайлович – Чӑваш патшалӑх ял хуҫалӑх интститучӗн пӗрремӗш выпускникӗ. Диплом илсен вӑл пурнӑҫне ял хуҫалӑхӗпе ҫыхӑнтарнӑ. Роза Романовна вара медучилище пӗтернӗ, ФАПра, район пульницинче ӗҫленӗ.
Мӑшӑр икӗ ача ҫуратса ӳстернӗ. Паянхи кун Родионовсен – 5 мӑнук, 4 кӗҫӗн мӑнук. Пӗр мӑнукӗ хальхи вӑхӑтра ятарлӑ ҫар операцийӗнче медсестрара ӗҫлет.
Упӑшкипе арӑмӗ – 89 ҫулта. Ҫапах ахаль лармаҫҫӗ – кил хуҫалӑхне тытса пыраҫҫӗ.
Муркаш округӗнчи Оринин ялӗнче пурӑнакан Дмитриевсем изумруд туя паллӑ тунӑ. Йӑлана кӗнӗ тӑрӑх, вӗсем ЗАГСра пӗр-пӗрне ҫӗрӗ тӑхӑнтартнӑ.
Николай Никоноровичпа Галина Николаевна ветеринари пунктӗнче паллашнӑ. Николай унта фельдшерта ӗҫленӗ. Галина вара выльӑх-чӗрлӗх ӗрчетессипе литература илме килнӗ. Ҫапла паллашса кайнӑ вӗсем. Ҫапла ҫамрӑксем 1971 ҫулта пӗрлешнӗ. Дмитриевсем виҫӗ ача ҫуратса ӳстернӗ.
Николай Никонорович ӗмӗр тӑршшӗпе ветеринарта ӗҫленӗ, «Ӗҫ ветеранӗ» хисеплӗ ят илнӗ. Галина Николаевна Куславкка округӗнчи Тӗрлемесре бухгалтер курсне пӗтернӗ. Малтан ял канашӗнче, унтан перекет кассинче ӗҫленӗ.
Николай Никонорович кӗнеке вулама юратать. Ҫулталӑкне 70 кӗнеке ытла вуласа тухать, хайлавсене мӑшӑрне каласа кӑтартать. Галина Николаевна вара ӑна итлеме питӗ юратать.
Муркашра пурӑнакан Николай Алексеев 100 ҫул тултарнӑ. Мӗн пӗчӗкрен вӑл ӗҫпе пиҫӗхсе ӳснӗ.
Тӑван ҫӗршывӑн Аслӑ вӑрҫи пуҫлансан вӑл окоп чавма кайнӑ. 1943 ҫулхи кӗркунне вара ун патне фронта кайма повестка килнӗ. 1945 ҫултанпа Николай Гаврилович Инҫет Хӗвелтухӑҫӗнче Япони милитарисчӗсене хирӗҫ ҫапӑҫнӑ, 2-мӗш механизациленӗ колоннӑн рядовой салтакӗ пулнӑ. Киле вӑл 1950 ҫулхи ҫу уйӑхӗн 9-мӗшӗнче кӑна, Ҫӗнтерӳ кунӗнче, таврӑннӑ. Мӑшӑрӗпе 4 ача ҫуратса ӳстернӗ. Ҫӗнтерӳ кунӗ уншӑн тепӗр пулӑмпа та асра юлнӑ: 1959 ҫулхи ҫу уйӑхӗн 9-мӗшӗнче вӗсен йӗкӗреш ҫуралнӑ.
Николай Гаврилович – Муркаш округӗн хисеплӗ ҫынни.
Муркаш округӗн пуҫлӑхӗ Алексей Матросов хӑйӗн ирӗкӗпе ӗҫ вырӑнне пушатнӑ. Кун пирки «Правда ПФО» кӑларӑм пӗлтерет. Пуш уйӑхӗн 3-мӗшӗнче пухӑннӑ Муркаш округӗн депутачӗсем пуҫлӑхӑн заявленине тивӗҫтернӗ, ӗҫ вырӑнне пушатнипе килӗшнӗ.
Халӗ Алексей Матросов вырӑнӗнче вӑхӑтлӑха унӑн пӗрремӗш ҫумӗ ӗҫлӗ. Вӑл — тирпей-илем кӗртес тата территорисене аталантарас енӗпе ӗҫлекен управленийӗн пуҫлӑхӗ Андрей Мясников.
Алексей Матросов Муркаш тӑрӑхне 2022 ҫултан ертсе пыма тытӑннӑ. 2025 ҫулта ӑна тӑлӑх ачасем валли начар хваттерсем туянса панӑшӑн судпа айӑпланӑччӗ. Суд ӗҫе пӑхса тухнӑ хыҫҫӑн Муркаш округӗн пуҫлӑхне пуҫиле яваплӑхран хӑтарнӑ. Халӗ вӑл хӑй ирӗкӗпе ӗҫ вырӑнне пушатнӑ.
Ӗнер, нарӑс уйӑхӗн 2-мӗшӗнче, Чӑваш Республикин тава тивӗҫлӗ тренерӗ Геральд Салдимиров 70 ҫул тултарнӑ.
Геральд Прокопьевич биатлон енӗпе хӑй вӑхӑтӗнче Чӑваш Ен чемпионӗ ята тата Атӑлҫи тӑрӑхӗнчи регионсен хӗллехи спартакиадинче бронза медале тивӗҫнӗ.
Муркаш районӗнчи Мӑн Сӗнтӗрти вӑтам шкулта вӗреннӗ чухне йӗлтӗр секцине ҫӳренӗ. 1993 ҫулта Челябинскри физкультура институтӗнчен вӗренсе тухнӑ.
Халӗ вӑл Шупашкарти 2-мӗш Олимп резервӗн спорт шкулӗнче тӑрӑшать. Геральд Прокопьевич 10 ытла Раҫҫейӗн спорт мастерне вӗрентсе кӑларнӑ, вӗсен йышӗнче тӗнче, Европа чемпионӗсемпе Олимп вӑййисен ҫӗнтерӳҫисем пур.
+17.5 °C